Alla Itolae Nusa 29
Eleki Yakupe ikeu rame bei otoi mere lori tapele rebe sapleuke lemataije sa.
Kena iluake, ilimese keholi, iselu prigi kena otoi sae me kai iselu pipi kai domba toini telu untulu tehaike prigi mere, le piasare tamata esi inukelu ete mere. Prigi mere esi obi kena batu elake.
Sepo tamata maka piala binatane esi lupuke pusue pipi kai dombaru ete mere peneka pine esi lolike batu mere bei prigire leke esi inuke pipiaru kai dombaru. Esi inuke pipi kai dombaru pela pine esi obi suike prigire kena batu mere.
Eleki Yakupe itneusi be, “Kwalia, imi meru tamata bei etia?” Esi ralake be, “Ami meiju tamata Harane.”
Yakupe itneu suike be, “Hoko imi rekwa Nahore eni upui Labane o?” Esi ralake be, “Yele, ami rekwai.”
Yakupe itneu suike be, “Eri mimise neko?” Esi ombe, “Eri mise! Aselu, ndire eni nanae bina Rahela iluake le eni pipi kai dombaru.”
Yakupe ibeteke lokosi be, “Eru kpita sa olase kena kusue pipi kai dombaru kena esi kandane mosa, hoko imi inukelu leke keu ala suikelu lekwe.”
Po esi ralakeni be, “Ami inukelu mosa le tamata maketa esi luake le esieru mosa, sepo pipi kai dombaru pusulu luake mina pine ami lolike bature bei prigire eleki ami inukelu sakesa.”
Kena Yakupe ilepa kaisi sa, Rahela iluake le amai eni pipi kai dombaru le ialalu.
Kena Yakupe iselu Rahela, kai memei Labane eni pipi kai dombaru, hoko ikeu lokoi kai ilolike bature bei prigire esi nanaije, eleki iono pipi kai domba meru ukinu.
Eleki Yakupe iata Rahela kai irani le laleije penu.
Ialena ete Rahela be, “Au meije amamu eni betai Ripka eni nanae.” Eleki Rahela ileu akmete kena ibeteke ete amai.
Kena Labane ilene kena Yakupe, betai eni nanare iluake, ibala sapai, eleki inopai kai iatai eleki ikerini lorau luma. Eleki Yakupe ialenake pusue yelu rebe eono eteije ete memei Labane.
Labane ibeteke lokoi be, “Tinai, ale mere arulu bei au.” Eleki Yakupe irue kai Labane bulane inai.
Eleki Labane ibeteke loko Yakup be, “Arulu bei au eleki akerike ete aure asupu sasaisa mo hoko mise mo. Abeteke ete au be, asuka seli amu makerike esi beline kena saisa?”
Labane eni nanae bina lua, menare eni nane Lea kai mulire eni nane Rahela.
Lea mataije nteki, yo Rahela nanakwalaije mise kai inteki.
Yakupe lalei loko Rahela hoko ibeteke loko Labane be, “Au suka kerike ete memete ale musuna itu sepo asuka le Rahela ete au.”
Labane ibeteke be, “Mise lesi au rilukeni ete ale bei au rilukeni ete tamata mekete, hoko arue kai au.”
Hoko Yakupe ikerike ete Labane musuna itu leke isupu kai kai Rahela, kai lalei loko Rahela kuate hoko inoake musuna itu meru saka batuke petua ilaru neka.
Eleki musuna itu meru lia peneka, Yakupe ibeteke loko Labane be, “Memete, musuna ituru lia peneka, memeta ariluke amu anare leke au kai kaini noma.”
Eleki Labane iono totliba hoko ikoti pusue tamata me kota mere.
Po kena kpetu mere Labane Ibete Rahela mo po ibete Lea ete Yakupe eleki Yakupe intulu kaini.
Labane iriluke eni tamata mekerike sae, bina eni nane Silpa loko Lea leke iono tamata makerike ete Lea.
Kena beleti mina pine Yakupe irekwa be ikai kai Lea. Yakupe ikeu loko Labane kai ibeteke be, “Memete, aono saisa ete au meije? Au kerike ete memete ale kena au kai kai Rahela. Le mula pine memete alemake aure?”
Labane iralake be, “Memete, atate ete meije kwete mulire ikai akmena bei kwete menare mo.
Namake eti totliba petua itu meiju lia mina pine au riluke auku anae Rahela ete ale sa, mahabe akerike ete au musuna itu lekwe.”
Yakupe isuka, hoko totliba mere lia eleki Labane iriluke Rahela ete Yakupe leke ikai kaini.
Kai Labane iriluke eni tamata mekerike sae, bina eni nane Bilha kena ikerike ete Rahela.
Yakupe intulu kai Rahela lekwe. Lalei loko Rahela titinai lesi bei Lea. Hoko ikerike ete Labane musuna itu suike leneka.
Kena TUHANE Iselu be Yakupe lelei loko Lea mo, hoko TUHANE Iono Lea isupu kwetele, po Rahele indote.
Lea ikeu blulu eleki iruele kwete mokwai hoko iono eni nane Rubena, esi natire selu auku anae meije, mokwai, le ibeteke be, “TUHANE Iselu auku susate, hoko meije auku mokwai lalei lokoku neka.”
Eleki ikeu blulu suike hoko iruele kwete mokwai hoko ibeteke be, “TUHANE Iselu be auku mokwai lalei lokoku mo hoko Iono au supu kwete mokwai suike.” Hoko iono kwetele mere eni nane Simeone, esi natire lene.
Eleki ikeu blulu suike hoko iruele kwete mokwai leneka hoko ibeteke be, “Rebai meije auku mokwai ilalei loko au neka le au rue le kwete mowaiya telu etei pende pe.” Hoko iono kwetele mere eni nane Lewi, esi natire ahbole.
Eleki ikeu blulu suike leneka hoko iruele kwete mokwai, ibeteke be, “Rebai meije au kotie trima kasi ete TUHANE.” Hoko iono kwetele mere eni nane Yehuda, esi natire isike. Eleki iruele kwetele suike moneka.